ផ្ដើមចេញពីកុមារីម្នាក់ ដែលរស់នៅក្នុងទីរួមខេត្តកំពត និងមានក្ដីស្រមៃថា ធំឡើងខ្លួនចង់ក្លាយទៅជាតារាចម្រៀងម្នាក់ បានបណ្ដាលឲ្យកុមារីម្នាក់នោះ មានការតាំងចិត្តយ៉ាងមុតមាំ បើទោះគេត្រូវបានក្រុមគ្រួសារ ហាមឃាត់យ៉ាងណាក៏ដោយ។ អ្វីដែលជាការតាំងចិត្តពីកុមារភាពវាមិនបានសាបរលាបនៅក្នុងដួងចិត្តរបស់នាងឡើយ នៅពេលធំដឹងក្ដីឡើង នាងបានខិតខំប្រឹងប្រែងតស៊ូពីមួយជំហាន ទៅមួយជំហានទៀត រហូតទទួលបានជោគជ័យក្លាយទៅជាតារាមួយដួង ដែលមានក្នុងដូងចិត្តរបស់ទស្សនិកជន។ ក្រោយពីសម្រេចក្ដីបំណងរួចហើយ កញ្ញាមិនបានព្រងើយកន្ដើយក្នុងជីវភាពឡើយ បើទោះបីខ្លួនជាស្រី ប៉ុន្តែកញ្ញាបានពោលពាក្យមួយឃ្លាថា៖ ” អ្នកអាច ខ្ញុំក៏អាច” ដែលពោរពេញទៅដោយជំនឿចិត្ត ក្នុងអំឡុងពេលដែលកញ្ញាបានផ្ដល់បទសម្ភាសន៍ មកកាន់ក្រុមការងាររបស់កម្ពុជាថ្មី។
ថ្វីត្បិតតែខ្លួនជាស្រីដែលមានរាងតូចស្តើង និងឥរិយាបថទន់ភ្លន់ ប៉ុន្តែកញ្ញាមានស្មារតីរឹងប៉ឹង និងគំនិតទូលំទូលាយក្នុងអាជីពសិល្បៈរបស់ខ្លួន។ មិនត្រឹមតែប៉ុណ្ណោះទេ កញ្ញាក៏មានភាពប៉ិនប្រសប់ និងពូកែចាត់ចែងលើមុខជំនួញ មិនចាញ់មនុស្សប្រុសប៉ុន្មានទេ។ ដោយមានការខិតខំប្រឹងប្រែងតស៊ូ អស់ពីកម្លាំងកាយចិត្តបានធ្វើឲ្យកញ្ញា បានទទួលនូវការគាំទ្រជាច្រើនពីសំណាក់អតិថិជន ក៏ដូចជាពីទស្សនិកជនរបស់កញ្ញាផងដែរ ដែលចំណុចនេះបានក្លាយជាភាពជោគជ័យដ៏ធំមួយសម្រាប់ជីវិតកញ្ញា និងក្រុមគ្រួសារទាំងមូល។ ខាងក្រោមនេះគឺជាជីវប្រវត្តិ និងដំណើរឈានចូលវិស័យសិល្បៈ របស់កញ្ញា ថាតើមានដំណើរការបែបណា មុននឹងគាត់ទទួលបាន ភាពជោគជ័យដូចពេលបច្ចុប្បន្ននេះ។
ជីវប្រវត្តិ និងការសិក្សា
កញ្ញា ញឹម ចាន់ថន មានស្រុកកំណើតនៅក្នុងទីរួមខេត្ត។ ឆ្នាំថ្មីនេះកញ្ញាមានអាយុ៣៤ឆ្នាំ ប៉ុន្តែភាពស្រស់ស្អាត និងភាពក្រម៉ិចក្រមើមរបស់គាត់ មើលទៅហាក់បីដូចជាមានវ័យទើបតែវ័យជាង២០ឆ្នាំប៉ុណ្ណោះ។ ក្រោមដំបូលផ្ទះដែលមានសមាជិកចំនួន៧នាក់ កញ្ញា ញឹម ចាន់ថនគឺជាកូនទី៣ក្នុងចំណោមបងប្អូនបង្កើតចំនួន ៥នាក់ ក្នុងនោះមានស្រី៣នាក់ ប្រុស២នាក់ ដែលមានឪពុកឈ្មោះ ឆឹង សាមឿង ជាមន្ត្រីរាជការ (ចូលនិវត្តន៍) និងម្ដាយឈ្មោះ ភី សារី (បច្ចុប្បន្នជាមេផ្ទះ)។ ស្ថិតក្នុងជីវភាពរស់នៅមួយ ដែលមិនសូវមានភាពប្រសើរក្នុងគ្រួសារ ទើបធ្វើឲ្យយុវតី ញឹម ចាន់ថន ដែលជាកូនកតញ្ញូមួយរូប បានសម្រេចចិត្តបញ្ឈប់ការសិក្សារបស់ខ្លួន ត្រឹមថ្នាក់ទី១០ ដើម្បីទៅជួយលក់ដូរអ្នកម្ដាយ ដើម្បីផ្គត់ផ្គង់ជីវភាព ក្នុងការរស់នៅប្រចាំថ្ងៃ។
ដំណើរឈានចូលវិស័យសិល្បៈ
សិល្បៈគឺជាវិស័យមួយ ដែលពោរពេញទៅដោយការពេញនិយម គ្រប់ស្រទាប់វណ្ណៈ និងគ្រប់វ័យទាំងអស់ ព្រោះវិស័យនេះមានការបែងចែកទៅតាមបែបផែនផ្សេងៗ ដោយមាន ទាំងសម័យ និងបុរាណ ដែលក្នុងនោះរូមមានទាំងចម្រៀងភាពយន្តជាដើម។ ដោយឡែកយុវវ័យនាពេលបច្ចុប្បន្ននេះ ពួកគេនិយមចូលចិត្តយកបទចម្រៀងបែបសម័យ ហើយពួកគេមិនមែនត្រឹមតែចូលចិត្តប៉ុណ្ណោះទេ ប៉ុន្តែពួកគេថែមទាំងច្រៀងកម្សាន្តតាមថែមទៀតផង មានយុវវ័យខ្លះរហូតដល់ថ្នាក់ទិញសៀវភៅចម្រៀងមកមើល ព្រោះគិតថា ចាំស្ដាប់បទចម្រៀងដែលខ្លួនពេញចិត្តយូរពេក។ ជាក់ស្ដែងកញ្ញា ញឹម ចាន់ថន កាលពីនៅវ័យកុមារភាព តែងតែចូលចិត្តច្រៀងលេងតែម្នាក់ឯង ជារៀងរាល់ថ្ងៃមិនថានៅទីណា ឬ កំពុងតែធ្វើអ្វីនោះទេ។ ពេលខ្លះសូម្បីតែដាំបាយ ធ្វើម្ហូបក៏មាន អមដោយបទចម្រៀងដ៏ក្រអូនក្រអៅរបស់កញ្ញាផងដែរ ចំណែកពេលខ្លះទៀត ខណៈពេលដែលកញ្ញាជួយលក់ដូរម្ដាយ (លក់បង្អែម) ក៏កញ្ញាច្រៀងឮរំពង។
ដោយនិស្ស័យស្រឡាញ់ និងចូលចិត្តចម្រៀង គាត់ក៏បានសន្សំប្រាក់មួយចំនួនទិញបានកូនសៀវភៅចម្រៀងមួយក្បាល សម្រាប់មើលខណៈដែលនាងមានពេលទំនេរ។ ការធ្វើបែបនេះគឺកញ្ញាអាចឆ្លៀតមើល និងច្រៀងបានគ្រប់ពេលវេលា ដែលយូរៗទៅធ្វើឲ្យកញ្ញាកាន់តែចូលចិត្ត និងចង់ក្លាយទៅជាអ្នកចម្រៀងនៅលើឆាក។ ជាចៃដន្យនៅក្នុងខេត្តកំពត មានការប្រឡងចម្រៀង ដែលពេលនោះធ្វើឲ្យកញ្ញាមានចំណាប់ អារម្មណ៍យ៉ាងខ្លាំង ហើយក៏បានដាក់ពាក្យប្រឡងចម្រៀងនៅពេលនោះតែម្ដង។ នៅក្នុងការប្រឡងមានបេក្ខជន បេក្ខនារី ជាច្រើនដែលមកចូលរួម ពីតាមបណ្ដាស្រុកនានានៅក្នុងខេត្តកំពត មកប្រឡងនៅទីរួមខេត្តទាំងអស់គ្នា។ ពីមួយដំណាក់កាលទៅមួយដំណាក់កាល កញ្ញា ញឹម ចាន់ថន បានឆ្លងកាត់នូវការប្រឡងជម្រុះ ពីបេក្ខជនជាច្រើនរយនាក់ រហូតដល់វគ្គផ្ដាច់ព្រ័ត្រ កញ្ញាក៏បានជ្រើសរើសយកបទ “ស្រណោះភ្លេងការ” និងបទ “ចង្វាក់មីហ្គាឌែន”។
ជាលទ្ធផលនៃការប្រឡងកញ្ញាបានជាប់ចំណាត់ថ្នាក់លេខ៣។ កញ្ញា ញឹម ចាន់ថន បាន បង្ហើបឲ្យដឹងថា៖ ”តាមពិតទៅ ការប្រឡងជាប់របស់ខ្ញុំភាគច្រើន មិនមែនដោយសារសំឡេងនោះទេ ប៉ុន្តែគឺដោយសារកាយវិការ ក្រម៉ិចក្រមើមរបស់ខ្ញុំផ្ទាល់តែម្ដង មូលហេតុ ដែលខ្ញុំហ៊ាននិយាយបែបនេះ ព្រោះតែគណៈកម្មការដែលជាអ្នកដាក់ពិន្ទុ បាននិយាយប្រាប់នាងខ្ញុំដោយផ្ទាល់។ បន្ទាប់ពីជាប់ឈ្មោះជាតារាជាប់លេខប្រចាំខេត្តមក កញ្ញា បានត្រូវគេអញ្ជើញទៅចូលរួមច្រៀង ក្នុងវង់អកកេសក៏ដូចជាតាមហាងនានាជាញឹកញាប់។ ថ្ងៃមួយអ្នកមីងចន្ធី ដែលធ្វើការនៅទូរទស្សន៍ប៉ុស្ដិ៍អប្សរា ក៏បានជួបជាមួយកញ្ញា។
ដោយសារមាននិស្ស័យនិងមើលឃើញ ពីសមត្ថភាពរបស់កញ្ញាគាត់ បានផ្ដល់ឱកាសឲ្យកញ្ញាបានឡើងច្រៀងនៅលើឆាក ទូរទស្សន៍ប៉ុស្តិ៍អប្សរា ក្នុងកម្មវិធីប្រគុំតន្ត្រីចម្រៀងយុវវ័យ។ ពេលនោះកញ្ញាមានក្តីរំភើបជាខ្លាំងព្រោះ ថានេះជាក្តីស្រមៃតាំងពីកុមារភាពមកម្ល៉េះ ហើយក៏មិននឹងស្មានថាខ្លួនបានបង្ហាញមុខ លើកញ្ចក់ទូរទស្សន៍នោះដែរ ដែលជាហេតុធ្វើឲ្យកញ្ញាខំស្ទុះស្ទារ ធ្វើ យ៉ាងណាដើម្បីរកប្រាក់ ទិញសម្លៀកបំពាក់ថ្មីសម្រាប់ការឡើងសម្តែងនាពេលខាងមុខ។
ជួនជាពេលនោះ កញ្ញាក៏បាននឹកឃើញសុំលុយម្ដាយ ដែលបានផ្សែផ្សំពីការលក់ដូររបស់គាត់ ដោយកញ្ញាមិនមានជម្រើសអ្វី ក្រៅពីនេះនោះទេដើម្បីទិញសម្លៀកបំពាក់។ បន្ទាប់ពីបានរៀបចំរួចស្រេចបាច់អស់ហើយ អ្នកមីង ចន្ធី បាននាំកញ្ញាមកកាន់ទីក្រុងភ្នំពេញ និងបានឲ្យកញ្ញាឡើងឆាកសម្តែងនៅក្នុងឆ្នាំ១៩៩៨។
ភាពល្បីល្បាញក្នុងការប្រឡូកវិស័យសិល្បៈ
ដោយមានការតស៊ូក្នុងការប្រឡូក ក្នុងវិស័យសិល្បៈពីមួយថ្ងៃទៅមួយថ្ងៃ និងមានបទពិសោធន៍ក្នុងការឡើងឆាក ធ្វើឲ្យកញ្ញាបានស្គាល់អ្នករួមអាជីពជាមួយគ្នាជាច្រើនរូប ដែលមិនទាន់សូវមានប្រជាប្រិយដូចគ្នានាសម័យនោះ។ ពេលនោះកញ្ញា និងមិត្តភក្តិមួយចំនួនទៀត បានជួបនិងលោក កែវ ផាត ដែលជាតន្ត្រីករ បានផ្តល់គំនិតដល់ពួកគេ ក្នុងការបង្កើតជាក្រុមតារាចម្រៀងមួយ។ ការធ្វើបែបនេះព្រោះដើម្បីបង្កើន នូវចំណាប់ អារម្មណ៍របស់ទស្សនិកជន។ ដោយមានការយល់ឃើញថា នេះគឺជាគំនិតដ៏ល្អនោះ ក្នុងឆ្នាំ ២០០៤ កញ្ញានិងមិត្តភក្តិបួននាក់ទៀត ក្នុងនោះរួមមានកញ្ញា ស៊ឹម ថៃណា លោក ហេង កាន់ឌី លោក ម៉ៃ សុគន្ធ លោក មាស សុខរតនៈ និង កញ្ញា ញឹម ចាន់ថន ផ្ទាល់តែម្តងបានបង្កើត ក្រុមចម្រៀងមួយ ដែលមានឈ្មោះថា High Rock ។ ក្នុងការបង្កើតក្រុមចម្រៀងដំបូង បានជួប ប្រទះនូវឧបសគ្គមួយចំនួន ដែលក្នុងនោះរួមមានការចំណាយដើមទុន តាមរយៈសម្តីផ្ទាល់ របស់កញ្ញាបានប្រាប់ក្រុមការងារថា៖ ”ដំបូងឡើយក្រុមរបស់ពួកខ្ញុំ បានរៃប្រាក់គ្នាក្នុងម្នាក់ ២០០ដុល្លារ ក្នុងការផលិតស៊ីឌី វីស៊ីឌី សម្រាប់ លក់ជាដើម។ ចំណែកភាព លំបាកទី២ ក្រោយពីពួកគេបានផលិតចេញជា ស៊ីឌី និង វីស៊ីឌីហើយនោះ ពួកគេចាំបាច់ត្រូវចុះទៅទីផ្សារ ដើម្បីរកអតិថិជនដោយខ្លួនឯងផ្ទាល់។ ការចេញទៅជួបអតិថិជនដោយផ្ទាល់ វាមិនមែនជារឿងងាយស្រួលនោះទេ គឺពេលដែលពួកគេចុះទៅឃោសនាលក់ អតិថិជនភាគច្រើនមិនបានអើពើនឹងពួកគេទេ ព្រោះតែពួកគេមិនមានផលិតកម្មច្បាស់លាស់ និងមិនមានភាពល្បីល្បាញ។
ទោះបីជាយ៉ាងណាក៏ដោយ ដោយមានសេចក្តីព្យាយាមមិនរាថយនោះ នៅទីបំផុតពួកគេក៏បានទទួលលទ្ធផលដ៏គាប់ប្រសើរ គឺបទចម្រៀងរបស់ពួកគេ ត្រូវបានគេចាក់តាមប៉ុស្តិ៍វិទ្យុនានា និងក្នុងកម្មវិធីបុណ្យទានផ្សេងៗផងដែរ ហើយមិនយូរប៉ុន្មានពួកគេក៏ត្រូវបានកម្មវិធីទូរទស្សន៍មួយចំនួន អញ្ជើញឲ្យចូលច្រៀងផងដែរ។ នាពេលនោះពួកគេក៏បានទទួលឈ្មោះបោះសំឡេង ពីសំណាក់ទស្សនិកជនជាច្រើន ជាពិសេសចំពោះយុវវ័យយ៉ាងមិញ ចំពោះបទដែលពួកគេទទួលបានជោគជ័យ គឺមានចំណងជើងថា “ដើម្បីស្នេហ៍” និង “ជួយបានគ្រប់យ៉ាង”។ ក្រោយមកទៀត កញ្ញា ចាន់ថន បានគេទំនាក់ទំនងឲ្យធ្វើជាពិធីករក្នុងកម្មវិធី “ស្រីស្រស់ប្រុសស្អាត” ប្រចាំប៉ុស្តិ៍ស៊ីធីអិន។
ដោយសារចំណុចទាំងនេះហើយ បានធ្វើឲ្យកញ្ញាមានការវិវឌ្ឍឥតឈប់ឈរ រហូតឈានទៅដល់ការសម្តែងជាខ្សែភាពយន្តជាច្រើនរឿង ដែលទទួលបានការគាំទ្រពីទស្សនិកជនក្នុងនោះមានដូចជារឿង “ល្មមហើយលោកប្តី“ និង “សម្រស់ជីវិត” ជាដើម។
អាជីពក្រៅពីសិល្បៈ
ថ្វីត្បិតតែកញ្ញា ចាន់ថន ជាស្ត្រីមួយរូបដែលមានរាងតូចច្រឡឹង និងមានកម្លាំងទន់ខ្សោយ ប៉ុន្តែដោយមានសេចក្តីព្យាយាម និងកើតមានគំនិតក្នុងការធ្វើជំនួញ កញ្ញាក៏បានបើកហាង លក់សម្លៀកបំពាក់មួយកន្លែង។ តាមពិតហាងរបស់កញ្ញា គឺបានដំណើរការទៅដោយរលូន ប៉ុន្តែដោយរវល់នឹងការច្រៀង ក៏ដូចជាការសម្តែង បានធ្វើឲ្យកញ្ញាបិទហាងទៅវិញ។ មិនយូរ ប៉ុន្មានក៏បានបើកជាផលិតកម្មមួយ ដែលមានឈ្មោះថា ធីវីប្រូដាក់ស្ហិន (TV Production) ប៉ុន្តែ ដោយមានការថតចម្លងជា ស៊ីឌី និង វីស៊ីឌីច្រើនពេក ធ្វើឲ្យការបើកផលិតកម្មរបស់កញ្ញា ទទួលនូវការបរាជ័យ។ ទោះបីជាយ៉ាងណាក៏ដោយ ក្រៅពីអាជីពជាសិល្បៈកញ្ញា នៅមានរបរ ផ្ទាល់ខ្លួនមួយទៀត ដែលពុំសូវបានបង្ហាញឲ្យសាធារណជនបានជ្រាបនៅឡើយ នោះគឺការទទួលការរៀបចំឆាកមានក្រុមតន្ត្រីបុរាណ និងសម័យ សម្អាងការ និងដេគ័រផ្កា គ្រប់កម្មវិធី សម្រាប់របរមួយនេះ កញ្ញាបង្កើតតាំងពីឆ្នាំ ២០០៨ មកម្ល៉េះ។
រហូតមកដល់បច្ចុប្បន្ននេះ ក្រៅពីការទទួលរៀបចំឆាក និងមានក្រុមតន្រី្តសម្រាប់ក្នុងកម្មវិធីខួបកំណើត ក៏ដូចជាកម្មវិធីមង្គលការហើយនោះ កញ្ញាក៏ជាជំនួយការអគ្គនាយិកាមជ្ឈមណ្ឌលឌែរម៉ូគ្លីនិក ប្រកបដោយភាពជោគជ័យផងមួយរូបផងដែរ។
តាមរយៈការសម្តែងឲ្យឃើញរបស់កញ្ញា ចាន់ថន គឺគាត់ជាមនុស្សមា្នក់ ដែលមានចរិករួសរាយ និងមិនប្រកាន់ខ្លួននោះទេ។ កញ្ញាបានប្រាប់ថា៖ ”ខ្ញុំមិនមែនជាមនុស្ស ដែលចូលចិត្តប្រកាន់ខ្លួននោះទេ ព្រោះខ្ញុំគឺមានកំណើតជាអ្នកក្រីក្រមួយរូបដែរ”។
គាត់បានបន្ថែមថា៖ “ចាំបាច់ទៅប្រកាន់ខ្លួនហួសធ្វើអ្វី គ្មានអ្នកណាគេមកសុំអ្វីពីយើងនោះទេ។ មួយវិញទៀត សេចក្តីក្លាហាននិង ភាពក្រម៉ិចក្រមើមក៏ជាចំណែកមួយ ដែលអាចទាក់ទាញទស្សនិកជនឲ្យមានអារម្មណ៍រីករាយ ទៅតាមកាយវិកាទាំងនេះផងដែរ”។ ដោយឡែកចំពោះភាពជោគជ័យក្នុងមុខជំនួញវិញ គឺមានភាពខុសគ្នាមួយចំនួនពីអាជីពជាសិល្បៈ។ ជាការពិត ក្នុងនាមជាអ្នកផ្តល់នូវសេវាកម្ម គឺធ្វើយ៉ាងណាត្រូវចេះយកចិត្តអតិថិជន ចាត់ទុកអតិថិជនដូចជាស្តេច អីចឹងទេ អ្វីដែលសំខាន់ត្រូវមានភាពរួសរាយរាក់ទាក់ និងការអត់ធ្មត់ខ្លាំងចំពោះពួកគេ។ ចំណុចសំខាន់មួយទៀត គឺត្រូវគោរពពេលវេលា និងមានភាពស្មោះត្រង់ចំពោះអតិថិជន ដែលនេះជារឿងយ៉ាងសំខាន់ក្នុងការធ្វើមុខជំនួញ ដ៏មានប្រសិទ្ធភាព ព្រោះថាមនុស្សទូទៅតែងតែចង់ធ្វើការ ជាមួយមនុស្សដែលភាពស្មោះត្រង់និងគោរពពេលវេលាខ្ជាប់ខ្ជួន។
ជារួមក្នុងការធ្វើជំនួញ ក៏ដូចជាអ្នកសិល្បៈចាំបាច់ ត្រូវតែស្រឡាញ់អាជីពរបស់ខ្លួន និងមានការតស៊ូអត់ធ្មត់ មិនត្រូវរាថយពេលជួបនឹងការលំបាកនានា និងតាំងចិត្តថា “អ្នកអាចធ្វើបាន ខ្ញុំក៏អាចធ្វើបានដែរ” នេះជាសម្តីរបស់កញ្ញា ចាន់ថន៕
កម្ពុជាថ្មី
